Sverrir snýr aftur á völlinn

Sverrir Ingi Ingason landsliðsmaður í knattspyrnu getur á morgun spilað sinn fyrsta leik í hálfan sjöunda mánuð.

Sverrir lék síðast með gríska liðinu PAOK í lok apríl en hann þurfti að gangast undir uppskurð á hné í maímánuði og hefur ekkert leikið frá þeim tíma.

Hann er í leikmannahópi varaliðs PAOK sem á morgun sækir heim varalið Olympiacos í fyrstu umferð grísku B-deildarinnar, sem fer loks af stað eftir langt hlé og frestanir vegna kórónuveirunnar.

Á heimasíðu PAOK er greint frá því að varaliðið fái góðan liðsauka í Sverri en hann var fastamaður í vörn aðalliðs félagsins þar til hann meiddist.

• Blogga um frétt