Fékk heimsmeistaratreyju Zidane í plastpoka

Danny Murphy, fyrrverandi leikmaður Liverpool, rifjaði á dögunum upp skondna sögu af því þegar Gérard Houllier heitinn, knattspyrnustjóri hans hjá þeim rauðklæddu færði honum væna gjöf í fremur óhefðbundnum umbúðum.

„Gérard Houllier var stjórinn minn hjá Liverpool og hann hafði mikil áhrif á og átti vingott við Zidane frá dögum þeirra í Frakklandi.

Houllier hélt sambandi við Zidane í gegnum árin og dag einn eftir að ég hafði verið valinn í enska landsliðið fór ég á skrifstofu Houlliers,“ sagði Murphy á talkSPORT útvarpsstöðinni.

Murphy lék sinn besta fótbolta á ferlinum undir stjórn Houlliers og unnu þeir saman alla stjóratíð Frakkans hjá Liverpool frá 1998 til 2004.

Danny Murphy í leik með Liverpool á sínum tíma. mbl.is

„Ég var búinn að vera á ákveðinni vegferð með Houllier hjá Liverpool. Ég fór úr því að vera sendur til baka á lán til Crewe í að koma til baka, komast í byrjunarliðið, verða fastamaður, vinna nokkra titla og komast í enska landsliðið.

Hann hóaði í mig á skrifstofu sína dag einn og var með plastpoka úr Tesco-vesluninni eða álíka, fleygði pokanum á skrifborðið og sagði: „Þetta er handa þér.“ Maður hugsaði bara með sér hvað væri eiginlega í gangi,“ sagði Murphy og hélt áfram:

„Ég tók treyju úr pokanum og þar stóð „Zidane“ aftan á með merki úr úrslitaleik HM á erminni og Houllier sagði: „Zinedine gaf mér treyjuna eftir úrslitaleikinn en ég vil gefa þér hana.“ Ég var í svolitlu áfalli!“

Um var að ræða treyju sem Zidane klæddist þegar hann skoraði tvö mörk í 3:0 sigri Frakklands gegn Brasilíu í úrslitaleik HM 1998 í Frakklandi.

Zidane skorar annað marka sinna í úrslitaleik HM árið 1998. mbl.is

„Hann sagði: „Ég er búinn að tala við hann. Þetta er í fínu lagi. Ég ætla að gefa þér treyjuna sem verðlaun fyrir þá vegferð sem þú hefur verið á.“ Hann útskýrði það fyrir mér að hann fór í nokkurs konar vegferð með Zidane.

Hann var ekki að bera mig saman við Zidane svo það sé alveg á hreinu! Þetta voru bara verðlaun frá honum, hann vildi gefa mér eitthvað til þess að láta mig vita að ég hafi staðið mig vel,“ sagði Murphy einnig.

• Blogga um frétt