Hrokafullur og hefur hagrætt úrslitum

Enski knattspyrnumaðurinn Jude Bellingham var allt annað en sáttur við dómarann Felix Zwayer eftir 2:3-tap Dortmund gegn Bayern München í toppslag þýsku 1. deildarinnar í gærkvöldi.  

Dortmund vildi tvær vítaspyrnur í leiknum en fékk ekki á meðan sigurmark Bayern kom úr vítaspyrnu. Bellingham sagði valið á dómaranum fyrir leikinn furðulegt, þar sem Zwayer hafi áður verið bendlaður við hagræðingu úrslita í þýsku B-deildinni.

„Það voru margar skrítnar ákvarðanir í þessum leik, en hverju áttu von á þegar þú gefur dómara sem hefur hagrætt úrslitum áður stærsta leikinn í Þýskalandi?“ sagði Bellingham pirraður í viðtali við Viaplay eftir leik.

Erling Braut Haaland, liðsfélagi Bellingham, var einnig mjög ósáttur í leikslok. „Þetta var dómaraskandall. Reus átti að fá víti. Ég spurði hvers vegna hann skoðaði ekki atvikið og hann sagði að það væri ekki þörf á því. Hann var hrokafullur,“ sagði Norðmaðurinn við sama miðil.

• Blogga um frétt