Heldur áfram að skrifa söguna

Knattspyrnudómarinn Rebecca Welch mun halda áfram að skrá sig í sögubækurnar þegar hún dæmir leik Plymouth Argyle og Birmingham City í þriðju umferð ensku bikarkeppninnar í knattspyrnu karla á nýju ári.

Welch verður þar með fyrsta konan til þess að dæma leik í þriðju umferð keppninnar, en hún hefur þegar dæmt í fyrstu umferðinni á þessu tímabili þegar hún var með flautuna í viðureign Banbury og Barrow í síðasta mánuði.

Á tímabilinu hefur hún dæmt fjóra leiki í ensku D-deildinni, tvo í bikarkeppni neðri deilda og dæmdi svo sinn fyrsta leik í ensku C-deildinni þegar hún var með flautuna í leik Morecambe og MK Dons fyrir tæpum mánuði.

Frétt af mbl.is

Valin fyrst kvenna til að dæma enskan karlaleik

Fyrr á árinu, í apríl, varð hún fyrsta konan til þess að dæma leik í enskri deildakeppni. Þá dæmdi hún leik Harrogate Town og Port Vale í D-deildinni.

• Blogga um frétt