28 ára hættur með landsliðinu

Marokkóski knattspyrnumaðurinn Hakim Ziyech er hættur að leika með landsliði þjóðar sinnar. 

Þetta tilkynnti hann í samtali við The Athletic. Ziyech, sem er 28 ára gamall, er samningsbundinn Chelsea í ensku úrvalsdeildinni en hann lék sinn fyrsta landsleik árið 2015.

Hann var ekki valinn í marakóska landsliðshópinn fyrir Afríkunótið sem fram fór í Kamerún og lauk á sunnudaginn.

„Ég er hættur að leika með marakóska landsliðinu,“ sagði Ziyech meðal annars í samtali við Athletic.

Vahid Halihodzic, landsliðsþjálfari Marokkó, hafði áður gagnrýnt leikmanninn fyrir hugarfar hans með landsliðinu.

„Hegðun hans í síðustu tveimur landsleikjum var langt frá því að vera ásættanleg,“ sagði Halihodzic í samtali við fjölmiðla í júní á síðasta ári.

„Hann er leiðtogi í liðinu og mikil fyrirmynd. Landsliðið er ofar öllu og hér eiga menn að leggja sig alla fram. Ef ekki þá verða menn ekki valdir,“ bætti þjálfarinn við.

• Blogga um frétt