Krefjast framsals Robinhos og gefa út alþjóðlega handtökuskipun

Fyrrverandi knattspyrnumaðurinn Robinho var árið 2017 dæmdur í níu ára fangelsi á Ítalíu fyrir að hafa í félagi við aðra hópnauðgað konu á næturklúbbi í Mílanó árið 2013. Af þeim sökum hefur verið gefin út alþjóðleg handtökuskipun á hendur honum.

Robinho lék með AC Milan þegar brotið átti sér stað og er nú búsettur í heimalandi sínu Brasilíu.

Hæstiréttur Ítalíu vísaði áfrýjun Robinho frá fyrir tæpum mánuði síðan og því stendur dómurinn.

Saksóknarar í Mílanó, sem hafa gefið út alþjóðlega handtökuskipun á hendur honum, hafa óskað eftir því við ítalska dómsmálaráðuneytið að það krefji brasilísk yfirvöld um að Robinho verði framseldur til Ítalíu svo hann geti hafið afplánun þar í landi.

Það er þó talið ólíklegt þar sem framsal er ekki leyfilegt samkvæmt brasilísku stjórnarskránni.

Þar sem búið er að gefa út alþjóðlega handtökuskipun á hendur Robinho gæti hann hins vegar verið handtekinn, en til þess að það gerist þarf Robinho að ferðast frá Brasilíu til annars lands sem framselur fólk til Ítalíu.

• Blogga um frétt