Guðrún Arnardóttir og liðsfélagar hennar í Rosengård tryggðu sér sæti í riðlakeppni Meistaradeildar kvenna í knattspyrnu í dag með sigri gegn Brann frá Noregi í síðari leik liðanna í 2. umferð keppninnar í Malmö í Svíþjóð.
Leiknum lauk með 3:1-sigri Rosengård en fyrri leik liðanna í Bergen lauk með 1:1-jafntefli og Rosengård vann því einvígið 4:2 samanlagt.
Mimmi Larsson skoraði tvívegis fyrir Rosengård í leiknum og Sofie Bredgaard eitt mark en Maria Brochmann minnkaði muninn fyrir Brann í 1:3 á 80. mínútu.
Guðrún lék allan leikinn í hjarta varnarinnar hjá Rosengård líkt og Svava Rós Guðmundsdóttir sem lék í fremstu víglínu hjá Brann.
Dregið verður í riðlakeppni Meistaradeildarinnar 3. október í höfuðstöðvum UEFA í Nyon í Sviss.