Allar þjóðir heims kenni leikvang við Pelé

Gianni Infantino, forseti Alþjóðaknattspyrnusambandsins FIFA, hvatti þjóðir heims, við kistulagningu brasilísku knattspyrnugoðsagnarinnar Pelé, að kenna einn leikvang í hverju landi við Brasilíumanninn.

Pelé lést 29. desember, 82 ára að aldri. Síðan hefur þjóðarsorg verið lýst yfir í Brasilíu og fjölmargir hafa vottað honum virðingu sína. Kistulagning fór fram í gær en útförin fer fram í dag. Pelé er talinn einn allra besti knattspyrnumaður sem uppi hefur verið.

Það verður forvitnilegt að sjá hvort af verður og þá hvernig útfærslan verður. Hvernig verða leikvangarnir valdir og svo framvegis.

Pelé kom til Íslands árið 1991 og í heimsókn sinni vígði hann meðal annars grasvöllinn á Egilsstöðum. Verður hann Pelé-völlurinn? Það verður framtíðin að leiða í ljós.