Fyrirliði Frakka ætlar ekki að spila á HM

Wendie Renard, ein besta knattspyrnukona heims um árabil og fyrirliði franska landsliðsins, segist ekki ætla að spila með liðinu á heimsmeistaramótinu í Ástralíu og á Nýja-Sjálandi í sumar.

Renard er ósátt við þjálfarann, Corinne Diacre, og stjórnunarstíl hennar og sagði í yfirlýsingu í dag að hún gæti ekki haldið áfram eins og málin hafa þróast og yrði að draga sig í hlé til að halda andlegri heilsu.

Sú stjórnun sem boðið sé upp á hjá franska landsliðinu sé ekki boðleg á hæsta stigi í fótboltanum. „Í hjarta mínu þjáist ég og ég vil ekki gera það lengur," sagði Renard sem er 32 ára gömul, leikur sem miðvörður en hefur skorað 34 mörk í 142 landsleikjum fyrir Frakkland.

Renard hefur spilað með Lyon allan sinn feril, er fyrirliði liðsins og hefur fimmtán sinnum orðið franskur meistari með því og átta sinnum unnið Meistaradeild Evrópu.

• Blogga um frétt