Antonio kom Hömrunum í góða stöðu

Michail Antonio skoraði bæði mörk West Ham United þegar liðið gerði góða ferð til Kýpur og lagði þar AEK Larnaca að velli, 2:0, í fyrri leik liðanna í 16-liða úrslitum Sambandsdeildar Evrópu í knattspyrnu í gærkvöldi.

Bæði mörkin skoraði Antonio í fyrri hálfleik, það fyrra á 36. mínútu og það síðara á annarri mínútu uppbótartíma hálfleiksins.

Víkingsbanarnir í Lech Poznan eru sömuleiðis í góðri stöðu eftir 2:0 sigur á Djurgården á heimavelli.

Antonio Milic og Filip Marchwinski skoruðu mörk pólska liðsins.

Staða Istanbul Basaksehir, sem sló Breiðablik út úr keppninni í haust, er sömuleiðis prýðileg en liðið hélt til Belgíu og gerði þar 1:1-jafntefli við Gent.

Stefano Okaka Chuka kom Basaksehir í forystu áður en Gift Orban jafnaði metin.

Öll úrslit gærkvöldsins:

AEK Larnaca – West Ham 0:2

Lech Poznan – Djurgården 2:0

Gent – Istanbul Basaksehir 1:1

Fiorentina – Sivasspor 1:0

Anderlecht – Villarreal 1:1

Basel – Slovan Bratislava 2:2

Sheriff Tiraspol – Nice 0:1

• Blogga um frétt