Valinn í landsliðið þrátt fyrir nauðgunarkæru

Achraf Hakimi, leikmaður París SG, hefur verið valinn í landsliðshóp Marokkó í knattspyrnu þrátt fyrir að hann hafi verið ákærður fyrir nauðgun í síðasta mánuði.

Hakimi var í lykilhlutverki í liði Marokkó sem komst afar óvænt í undanúrslit heimsmeistaramótsins í Katar í lok síðasta árs.

Hon­um er gefið að sök að hafa nauðgað konu á heim­ili sínu laug­ar­dags­kvöldið 25. fe­brú­ar í kjöl­far þess að hún hafi neitað hon­um um sam­far­ir.

Sam­kvæmt franska miðlin­um Le Parisien hafi kon­unni tek­ist að sparka Hakimi frá sér, senda vin­konu sinni skila­boð og vin­kon­an svo sótt hana.

Kon­an dró kæru sína til baka en ákæru­valdið í Par­ís ákvað að flytja málið fyr­ir henn­ar hönd og leggja fram ákæru.

Hakimi hef­ur neitað öll­um ásök­un­um og gaf fé­lag hans PSG út yf­ir­lýs­ingu til stuðnings hon­um áður en ákær­an var lögð fram.

„Við stöndum við bakið á Achraf eins og allir Marokkóbúar. Hann er saklaus þar til sekt hans er sönnuð. Ég ræði mikið við Achraf eins og aðra leikmenn. Hann er rólegur og það skiptir mestu máli. Hann er sterkur persónuleiki, innan vallar sem utan, og við hugsum fyrst og fremst um fótboltann. Aðrir sjá um annað fyrir hann," sagði Walid Regragui landsliðsþjálfari Marokkó eftir að landsliðshópurinn var birtur.

Marokkó mætir Brasilíu og Perú í vináttulandsleikjum 25. og 28. mars en það verða fyrstu leikir liðsins eftir heimsmeistaramótið.

• Blogga um frétt