Opin fyrir endurkomu eftir brottrekstur þjálfarans

Wendie Renard, fyrrverandi fyrirliði franska landsliðsins í knattspyrnu, kveðst opin fyrir því að snúa aftur í landsliðið fari svo að nýr landsliðsþjálfari ákveði að velja hana.

Renard lýsti því yfir í síðasta mánuði að hún myndi ekki gefa kost á sér í landsliðið með það fyrir augum að huga að andlegri heilsu sinni.

RMC Sport greindi frá því að á meðan Corinne Diacre væri landsliðsþjálfari myndi Renard ekki spila fyrir landsliðið.

Diacre var látin taka pokann sinn í síðustu viku og þar með hafa dyrnar opnast fyrir endurkomu.

„Það er landsliðsþjálfarans að velja mig ef ég stend mig vel með félagi mínu, en af hverju ekki?

Í eðli mínu er ég keppnismanneskja. Ég elska þessa treyju og vil gera allt sem í mínu valdi stendur til þess að vinna titil í henni,“ sagði Renard í samtali við útvarpsstöðina Europe 1.

• Blogga um frétt