Staða City vænleg eftir stórsigur

Enska meistaraliðið Manchester City stendur afar vel að vígi í átta liða úrslitum Meistaradeildar karla í fótbolta eftir sigur gegn þýska meistaraliðinu Bayern München á heimavelli í Manchester, 3:0, í kvöld.

Inter Mílanó er líka í góðri stöðu eftir útisigur gegn Benfica í Lissabon, 2:0. Nicolo Barella skoraði á 51. mínútu og Romelu Lukaku bætti við marki úr vítaspyrnu á 82. mínútu.

City var sterkari aðilinn í fyrri hálfleiknum gegn Bayern og komst yfir á 27. mínútu þegar Rodri skoraði með glæsilegu skoti rétt utan vítateigs upp í vinstra hornið, 1:0.

Bayern byrjaði seinni hálfleikinn vel og Ederson í marki City varði þrjú hörkuskot frá Leroy Sané á fyrstu tíu mínútunum.

Eftir tvísýna baráttu kom vendipunktur leiksins á 70. mínútu. Dayot Upamecano gerði alvarleg varnarmistök, missti boltann og Erling Haaland slapp inn í vítateiginn vinstra megin. Hann lyfti boltanum fyrir markið á Bernardo Silva sem skoraði með skalla, 2:0.

City gekk á lagið og á 76. mínútu skoraði Haaland af stuttu færi, 3:0, eftir að John Stones skallaði boltann til hans.

Erfitt verður fyrir Bayern að vinna þennan mun upp í síðari leik liðanna í München.

Man. City	3:0	Bayern München	Opna lýsingu Loka
90. mín. 3 mínútur í uppbótartíma
Augnablik — sæki gögn...

• Blogga um frétt