15 ára piltur í hóp hjá Barcelona

Barcelona, topplið spænsku deildarinnar, hefur tilkynnt leikmannahóp sinn fyrir stórleik gegn Atlético Madríd í deildinni á morgun. Í hópnum er bráðefnilegur piltur sem er aðeins 15 ára gamall.

Sá heitir Lamine Yamal og unglingalandsliðsmaður Spánar sem á ættir að rekja til Miðbaugs-Gíneu.

Hann er vængmaður sem hefur leikið með U19-ára liði Barcelona á tímabilinu þrátt fyrir að fagna ekki 16 ára afmæli sínu fyrr en í sumar.

Ljóst er að Yamal verður á varamannabekknum í leiknum á morgun þar sem Börsungar tilkynntu 21 manns leikmannahóp, en alls mega lið í spænsku deildinni hafa tólf leikmenn á varamannabekknum. Þeir verða hins vegar tíu hjá Barcelona á morgun.

• Blogga um frétt