Losnar ekki úr steininum á næstunni

Brasilíski knattspyrnumaðurinn Daniel Alves losnar væntanlega ekki úr varðhaldi á Spáni á næstunni, þar sem dómstólar þar í landi höfnuðu beiðni lögfræðinga hans um að leysa hann úr haldi gegn tryggingu í dag.

Beiðni lögfræðinga Brasilíumannsins var hafnað, á þeim forsendum að Alves væri líklegur til að flýja Spán, yrði hann látinn laus úr haldi.

Alves hefur verið í gæsluvarðhaldi frá því í janúar, vegna gruns um að hafa brotið kynferðislega á konu á næturklúbbi í Barcelona í desember. Eft­ir að hafa hlýtt á framb­urð Al­ves, meints fórn­ar­lambs og eins vitn­is fyr­ir­skipaði dóm­ari að hann skyldi færður í fang­els­i í borg­inni án lausn­ar­gjalds. Alves hefur ávallt neitað sök í málinu.

Lög­fræðing­ar Al­ves lögðu fram beiðni til dóm­ara um að end­ur­skoða ákvörðunina og gefa Bras­il­íu­mann­in­um færi á að greiða lausn­ar­gjald, með því skil­yrði að Al­ves myndi láta vega­bréf sitt af hendi og fara ekki úr landi, auk þess sem hann myndi halda sér fjarri meintu fórn­ar­lambi og bæri ökkla­band.

Dóm­ar­inn hafnaði þeirri kröfu í dag og sagði fjár­hags­lega stöðu Al­ves of sterka til að hægt væri að treysta því að hann kæm­ist ekki úr landi. Yf­ir­völd á Spáni geta ekki farið fram á að framsal bras­il­ískra borg­ara frá heima­land­inu og yrði Al­ves því mögu­lega óhult­ur í heima­land­inu.

Verður hann því áfram í varðhaldi þar til rétt­ar­höld í mál­inu fara fram, en ekki hef­ur verið gef­in út dag­setn­ing fyr­ir þau, þar sem málið er enn í rann­sókn.

• Blogga um frétt