Þurfum að stöðva lið sem virðist óstöðvandi

Carlo Ancelotti, knattspyrnustjóri Evrópumeistara Real Madríd, fer ekki í grafgötur með það að liðið stendur frammi fyrir heljarinnar verkefni gegn Manchester City í undanúrslitum Meistaradeildar Evrópu.

Fyrri leikur liðanna fer fram á Santiago Bernabéu-vellinum í Madríd í kvöld.

Á blaðamannafundi í gær var Ancelotti spurður hvernig Madrídingar hygðust halda norska markahróknum Erling Haaland, sem hefur skorað 51 mark í 46 leikjum í öllum keppnum á tímabilinu, í skefjum.

„Við erum ekki bara að tala um að stöðva Haaland, heldur að stöðva lið sem virðist óstöðvandi,“ svaraði ítalski stjórinn.

Það eru ekki beint ýkjur hjá Ancelotti þar sem Man. City er taplaust í síðustu 20 leikjum í öllum keppnum. Í þeim hefur liðið unnið 17 leiki og gert þrjú jafntefli.

• Blogga um frétt