Köbenhavn ósátt við ummæli Ísaks

Danska knattspyrnufélagið FC Köbenhavn íhugar nú að hleypa íslenska landsliðsmanninum Ísak Bergmann Jóhannessyni frá félaginu vegna ummæla sem hann lét falla í íslenskum fjölmiðlum í aðdraganda nýafstaðins landsleikjaglugga.

„Ég nýtti mín tæki­færi þegar ég fékk þau. Eins og á móti AGF, þá bjó ég til mjög mörg færi fyr­ir liðsfé­laga mína og átti mjög góðan leik. Mér var svo hent á bekk­inn og er mjög ósátt­ur við það.

Ég segi það al­veg hreint út og er mjög ósátt­ur við það hvernig hef­ur verið komið fram við mig þarna. Góðir leik­menn vilja spila fót­bolta og von­andi get­ur það gerst á næsta tíma­bili,“ sagði Ísak í samtali við mbl.is fyrr í mánuðinum.

Frétt af mbl.is

„Mjög ósáttur við meðferðina á mér“

Samkvæmt danska miðlinum Ekstra Bladet eru forsvarsmenn Köbenhavn afar ósáttir við ummæli hans og huga nú að því að leyfa Ísak að fara frá félaginu, þó ekki komi fram hvort um sölu eða lán yrði að ræða.

Vill ekki spila fyrir annað lið í Danmörku

Í samtali sínu við mbl.is kvaðst Ísak sjálfur ekki vita hvort hann myndi spila með Köbenhavn eða öðru liði á næsta tímabili.

„Það verður bara að koma í ljós en ég er mjög ósátt­ur við meðferðina á mér þarna. Þegar ég fæ að spila mína stöðu þá finnst mér ég alltaf hafa staðið mig vel.

Það eru viss­ir leik­menn sem spila þarna og ég þarf bara að bíða eft­ir tæki­fær­inu mínu. En maður get­ur ekki beðið enda­laust. Maður þarf að sýna og sanna að maður eigi skilið að spila og ég hef gert það,“ sagði Skagamaðurinn.

Ísak var í aukahlutverki hjá Köbenhavn á síðasta tímabili er liðið vann tvöfalt og samkvæmt Ekstra Bladet hefur hann ekki áhuga á að spila fyrir annað lið í dönsku úrvalsdeildinni.

• Blogga um frétt