„Ég fékk reyndar ekki bílpróf fyrr en ég var orðinn 21 árs gamall,“ sagði knattspyrnumaðurinn fyrrverandi Ásgeir Börkur Ásgeirsson í Dagmálum.
Ásgeir Börkur, sem er 37 ára gamall, lagði skóna á hilluna eftir síðasta keppnistímabil en hann er hvað þekktastur fyrir tíma sinn með uppeldisfélagi sínu Fylki og var á meðal litríkustu karakteranna í íslenska boltanum lengi vel.
Ásgeir lék með Selfossi á láni frá Fylki, tímabilin 2007 og 2008, þar sem hann steig sín fyrstu meistaraflokksskref.
„Ég tók stundum rútuna frá BSÍ, á æfingar, ef mér gekk illa að fá far,“ sagði Ásgeir Börkur.
„Tómas á Kaffi Krús, sem var í stjórn á þessum tíma, sótti mig líka stundum í bæinn. Það er honum að þakka að ég er með bílpróf í dag.
Eftir einhvern leikinn þá kallaði Tommi í einhvern mann sem var á svæðinu og kynnti okkur. Þá kom í ljós að þetta var ökukennara. Tommi var örugglega orðinn alveg dauðþreyttur á því að sækja mig og ef ekki væri fyrir hann og Selfoss væri ég örugglega ekki með bílpróf í dag,“ sagði Ásgeir Börkur meðal annars.