„Þetta var alveg galið,“ sagði knattspyrnumaðurinn fyrrverandi Ásgeir Börkur Ásgeirsson í Dagmálum.
Ásgeir Börkur, sem er 37 ára gamall, lagði skóna á hilluna eftir síðasta keppnistímabil en hann er hvað þekktastur fyrir tíma sinn með uppeldisfélagi sínu Fylki og var á meðal litríkustu karakteranna í íslenska boltanum lengi vel.
Ásgeir Börkur skartaði mjög vígalegu skeggi þegar hann lék með GAIS í Svíþjóð árið 2014 og komst hann á lista hjá mörgum af stærstu fótboltamiðlum heims þegar fjallað var um best skeggjuðu fótboltamenn heims.
„Ég er ennþá að fá sendar myndir frá einhverjum gaurum í Síle þar sem þeir eru með mynd af mér upp á vegg hjá sér,“ sagði Ásgeir Börkur.
„Þetta var orðið svakalegt á sínum tíma og eiginlega of mikið. Ég er var með Instagram-reikning sem var kominn í 10.000 til 11.000 fylgjendur, og þar var fólk að skilja eftir ummæli við myndir af mömmu minni sem dæmi, það var of mikið,“ sagði Ásgeir Börkur meðal annars.