Brasilíska knattspyrnugoðsögnin Dunga slapp vel þegar hann lenti í óhugnanlegu bílslysi með eiginkonu sinni fyrir utan Curitíba í heimalandinu í gær.
Bíll þeirra hjóna hvolfdi og gjöreyðilagðist. Þrátt fyrir það sluppu þau bæði með minniháttar meiðsli, en voru flutt á sjúkrahús til athugunar.
Dunga var fyrirliði Brasilíu er liðið varð heimsmeistari árið 1994 og lék hann á þremur heimsmeistaramótum.
Þá var hann landsliðsþjálfari Brasilíu frá 2006 til 2010 og svo aftur frá 2014 til 2016.