Kólumbíski knattspyrnuframherjinn Cristian Arango, Chicho, hefur verið úrskurðaður í fjögurra leikja bann fyrir að hafa brotið gegn lögum bandarísku MLS-deildarinnar um áreitni.
Arango hefur farið á kostum með liði sínu Real Salt Lake í MLS-deildinni á tímabilinu en hann hefur skorað 17 mörk og lagt 11 upp í 23 leikjum á tímabilinu.
Hvorki MLS-deildin né Real Salt Lake greindu frá því hvað leiddi til bannsins. Félagið sagðist þó samþykkja ákvörðun deildarinnar í yfirlýsingu.
Arango missir af útileikjum gegn Los Angeles FC og Colorado Rapids og heimaleik gegn Atlas.
Þá missir hann einnig af Stjörnuleik MLS-deildarinnar.