Ramón Jesurún, forseti kólumbíska knattspyrnusambandsins, var handtekinn ásamt syni sínum Ramón Jamil eftir úrslitaleik Ameríkubikarsins á milli Kólumbíu og Argentínu.
Þeir eru sakaðir um að hafa ráðist á öryggisverði eftir tap Kólumbíu, 1:0, í Miami. Lögreglan handtók þá feðganna skömmu eftir atvikið.
Mikil ólæti voru í kringum úrslitaleikinn en hann hófst 82 mínútum seinna en áætlað var. Miðalausir áhorfendur voru alls staðar í kring og mikill troðningur skapaðist.
Jesurún-feðgarnir ætluðu að taka þátt í verðlaunaathöfninni eftir leik en öryggisverðir heftu för þeirra.
Einn öryggisvarðanna var ágengur og setti lófann á bringu sonarins. Faðirinn brást illa við og ýtti verðinum.
Sonurinn tók hann síðan hálstaki, dró hann niður í jörðina, og kýldi hann. Þá réðst sonurinn einnig á annan öryggisvörð samkvæmt fjölmiðlum á vettvangi.
Enn hefur ekkert heyrst frá kólumbíska knattspyrnusambandinu.