Knattspyrnumaðurinn Enzo Fernandez baðst afsökunar eftir að myndband af honum og liðsfélögum hans í argentínska landsliðinu að syngja lag um franska landsliðið fór á netið, en lagið er með niðrandi texta.
Argentínska landsliðið var að fagna sigri á Kólumbíu í úrslitaleiknum í Ameríkubikarnum og var í rútu þegar leikmenn liðsins sungu lag sem var gert um franska landsliðið á HM 2022. Textinn inniheldur kynþáttaníð og fordóma en í textanum segir meðal annars að franska landsliðið sé allt frá Angóla en lagið var samið af stuðningsmönnum Argentínu.
Fernandez var í beinni á samfélagsmiðlinum Instagram þegar liðið fór að syngja lagið.
Franski liðsfélagi Fernandez hjá Chelsea í ensku úrvalsdeildinni, Wesley Fofana, birti myndband af liðinu syngja lagið.
„Fótbolti árið 2024: óhindrað kynþáttaníð,“ skrifaði Fofana við myndbandið.
Fernandes birti afsökunarbeiðni á Instagram. „Ég vil biðjast afsökunar á myndbandi sem fór á Instagram síðuna mína meðan landsliðið var að fagna. Lagið inniheldur niðrandi texta og það er enginn afsökun fyrir þessum orðum. Ég er á móti fordómum og biðst afsökunar á að gleyma mér í fagnaðarlátunum. Þetta myndband, þetta augnablik og þessi texti sýnir ekki hvernig manneskja ég er, fyrirgefið.“