Einn var handtekinn þegar ljót slagsmál brutust út á knattspyrnumótinu Gothia Cup í dag, en mótið er stærsta mót heims fyrir yngri flokka og fer árlega fram í Gautaborg í Svíþjóð.
TV4 í Svíþjóð greinir frá að slagsmálin hafi brotist út eftir að lið frá Sameinuðu arabísku furstadæmunum vann spænskt lið. Í leikslok ögraði sigurliðið þeim spænsku og brutust í kjölfarið út ljót slagsmál.
Einn karlmaður var handtekinn fyrir sinn þátt í slagsmálunum en um foreldri eins leikmanns er að ræða. Samkvæmt TV4 byrjuðu foreldrar leikmanna beggja liða að slást eftir að það tókst að róa leikmenn.
Í kjölfar slagsmálanna voru bæði lið rekin úr keppninni.