Unai Simon, markvörður Evrópumeistara Spánar í knattspyrnu og Athletic Bilbao, verður frá keppni næstu fjóra mánuðina.
Hann gekkst undir uppskurð á úlnlið í gær eftir að hafa orðið fyrir tognun á Evrópumótinu í Þýskalandi.
Simon, sem er 27 ára gamall, lék sex af sjö leikjum Spánverja á EM en var hvíldur eins og svo margir fastamenn í lokaleik riðlakeppninnar gegn Albaníu.
Talið er að hann missi af í það minnsta fjórtán leikjum Athletic í spænsku deildinni og fjórum leikjum í Evrópudeildinni, sem og af leikjum Spánverja í Þjóðadeildinni í haust.