Guðlaugur Victor Pálsson, landsliðsmaður í knattspyrnu, er genginn til liðs við Plymouth Argyle í ensku B-deildinni.
Félagið tilkynnti hann sem nýjan leikmann í dag en hann kemur þangað frá KAS Eupen sem féll úr belgísku A-deildinni í vor. Guðlaugur Victor er 33 ára varnarmaður eða varnartengiliður og hefur leikið 44 landsleiki fyrir Íslands hönd.
Hann snýr þar með aftur til Englands eftir þrettán ára fjarveru en Guðlaugur Victor hóf atvinnuferilinn hjá Liverpool, þar sem hann spilaði með unglinga- og varaliði, og var lánaður um skeið til Dagenham í C-deildinni.
Hann hefur síðan leikið með Hibernian í Skotlandi, New York Red Bulls í Bandaríkjunum, Nijmegen í Hollandi, Helsingborg í Svíþjóð, Esbjerg í Danmörku, Zürich í Sviss, Darmstadt og Schalke í Þýskalandi, DC United í Bandaríkjunum og nú síðasta tímabil með Eupen í Belgíu.
🇮🇸 Welcome to Argyle, Victor Pálsson!
— Plymouth Argyle FC (@Argyle) July 25, 2024
The Icelandic international defender joins the club on a permanent contract ✍️#pafc