Íslenska landsliðskonan Emilía Kiær Ásgeirsdóttir skoraði bæði mörk Nordsjælland í 2:1 sigri liðsins gegn Köge í dönsku úrvalsdeildinni í dag.
Köge komst í 1:0 forystu á 34. mínútu eftir sjálfsmark frá Emilie Byrnak. Í uppbótartíma fyrri hálfleiks fékk Rebeka Winther, varnarmaður Köge, rautt spjald.
Á 59. mínútu jafnaði Emilía metin fyrir Nordsjælland. Aðeins sjö mínútum síðar kom hún Nordsjælland yfir með sínu öðru marki.
Mörkin urðu ekki fleiri og situr Nordsjælland á toppi deildarinnar með sex stig eftir tvo leiki.