Jóhann Berg Guðmundsson, landsliðsmaður í knattspyrnu, er á leið til sádiarabíska félagsins Al-Orobah, sem leikur í efstu deild þar í landi.
433.is greinir frá því að Jóhann Berg sé þegar floginn til Sádi-Arabíu og muni skrifa undir samning við Al-Orobah.
Liðið hafnaði í öðru sæti í B-deildinni á síðasta tímabili og leikur því á meðal þeirra bestu á komandi tímabili. Yrði hann annar Íslendingurinn sem semur í Sádi-Arabíu en Sara Björk Gunnarsdóttir samdi við Al-Qadsiah í kvennadeildinni fyrr í sumar.
Teljast það ansi óvæntar fréttir þar sem ekki er langt síðan hann skrifaði undir nýjan eins árs samning við Burnley, sem leikur í ensku B-deildinni.