Enska knattspyrnufélagið Preston North End hefur ráðið Paul Heckingbottom sem nýjan stjóra karlaliðsins, sem Skagamaðurinn Stefán Teitur Þórðarson leikur með.
Ryan Lowe lét óvænt af störfum eftir aðeins einn leik í ensku B-deildinni, þeim fyrsta hjá Stefáni Teiti fyrir félagið, fyrr í mánuðinum og hefur Preston nú fundið arftaka hans.
Heckingbottom var síðast knattspyrnustjóri Sheffield United og kom liðinu upp í ensku úrvalsdeildina á þarsíðasta tímabili en var rekinn í desember síðastliðnum eftir slæmt gengi á meðal þeirra bestu.
Hann hefur áður stýrt Leeds United og Barnsley á Englandi auk Hibernian í Skotlandi.