Valgeir Lunddal Friðriksson lagði upp mark sænska liðsins Häcken þegar það tapaði á heimavelli fyrir þýska liðinu Heidenheim, 1:2, í fyrri leik liðanna í 4. umferð undankeppni Sambandsdeildar Evrópu í kvöld.
Valgeir lagði upp jöfnunarmark fyrir Mikkel Rygaard á 36. mínútu og fór svo meiddur af velli tveimur mínútum síðar. Heidenheim tryggði sér svo sigurinn í síðari hálfleik.
Orri Steinn Óskarsson lék allan leikinn í fremstu víglínu hjá FC Köbenhavn sem lagði skoska liðið Kilmarnock að velli í Kaupmannahöfn, 2:0.
Kevin Diks og Rasmus Falk skoruðu mörk Köbenhavn. Rúnar Alex Rúnarsson var varamarkvörður liðsins.
Loks vann Elfsborg sterkan útisigur á Molde, 1:0, í 4. umferð undankeppni Evrópudeildarinnar.
Bæði Andri Fannar Baldursson og Eggert Aron Guðmundsson voru allan tímann á varamannabekknum hjá Elfsborg.