Knattspyrnukonan Guðrún Arnardóttir og samherjar hennar hjá Rosengård fóru ekki í viðtöl eftir sigur liðsins á Häcken í toppslag í sænsku úrvalsdeildinni í fótbolta í kvöld af öryggisástæðum.
Sænski miðillinn Sportbladet greinir frá að leikmanni liðsins hafi verið hótað á samfélagsmiðli og var því hætt við viðtöl eftir leikinn.
Rosengård hefur tilkynnt málið til lögreglu, sem og til knattspyrnusambands Svíþjóðar.
Guðrún skoraði sigurmarkið í leiknum sem endaði 1:0. Rosengård hefur unnið alla sextán leiki sína í deildinni til þessa og aðeins fengið á sig fjögur mörk.