Úrúgvæski knattspyrnumaðurinn Juan Izquierdo er látinn eftir að hafa hnigið niður í leik með liði sínu Nacional á fimmtudaginn í síðustu viku.
Nacional mætti þá Sao Paulo í Brasilíu í Meistaradeild Suður-Ameríku en Izquierdo kom inn á í hálfleik fyrir Sebastian Coates, fyrrverandi leikmann Liverpool.
Hann hneig niður á vellinum í uppbótartíma eftir að hafa farið í hjartastopp og var svo fluttur á Albert Einstein-sjúkrahúsið i Brasilíu þar sem honum var haldið sofandi í öndunarvél.
Hann lést í gær að því er fram kemur í tilkynningu félagsins en Izquierdo var einungis 27 ára gamall og varð tvívegis úrúgvæskur meistari á ferlinum.