Sveindís Jane Jónsdóttir var ekki í leikmannahópi Wolfsburg er liðið gerði jafntefli, 3:3, á heimavelli gegn Werder Bremen í fyrstu umferð þýsku 1. deildarinnar í fótbolta í dag.
Einhverjir stuðningsmenn Wolfsburg óttuðust að Sveindís væri á förum frá félaginu, en fjarvera hennar átti sér eðlilegar skýringar.
Samkvæmt Magenta Sport er Sveindís að glíma við vöðvameiðsli, en miðilinn greindi ekki frá í hvaða vöðva hún meiddist.
Ekki er því víst hve alvarleg meiðslin eru eða hve lengi Sveindís verður frá keppni.
Hún hefur verið í herbúðum Wolfsburg frá árinu 2021, en hún hefur einnig leikið með Keflavík, Breiðabliki og Kristianstad í Svíþjóð.