Knattspyrnumaðurinn þýski Niklas Sommer, leikmaður Nürnberg í heimalandinu, varð fyrir fólskulegri árás fyrir utan heimilið sitt í gær. Var Sommer verulega bólginn á nokkrum stöðum á andliti eftir árásina.
Samkvæmt Bild er talið að stuðningsmaður Nürnberg standi á bak við árásina og ástæðan sé mynd sem Sommer birti af sér á Instagram í Bayern München treyju.
Nürnberg mætti Magdeburg í þýsku 2. deildinni á laugardaginn var og voru borðar í stúkunni sjáanlegir með miður fallegum skilaboðum til Sommers í kjölfar myndbirtingarinnar.
Einn stuðningsmaður gekk svo skrefinu lengra og gekk í skrokk á Sommer.
„Félagið sættir sig aldrei við að leikmenn séu beittir ofbeldi. Við fordæmum þessa árás, sem er algjörlega á móti öllu sem við sem félag stöndum fyrir,“ segir í yfirlýsingu sem Nürnberg gaf frá sér.