Enska félagið Chelsea er langlíklegast til að vinna Sambandsdeild karla í fótbolta í vetur samkvæmt útreikningum knattspyrnuvefjarins Football Rankings.
Þar eru möguleikar allra 36 liðanna sem unnu sér sæti í deildarkeppni Sambandsdeildarinnar reiknaðir út og Chelsea ber höfuð og herðar yfir önnur lið með 40,6 prósent líkur á að standa uppi sem sigurvegari.
Real Betis frá Spáni er í öðru sæti með 16,5 prósent líkur og Fiorentina frá Ítalíu, lið Alberts Guðmundssonar, er í þriðja sæti með 15,7 prósent líkur.
Þaðan er svo langt bil niður í fjórða sætið en þar situr Heidenheim frá Þýskalandi með 5,1 prósent sigurmöguleika. Næst á eftir koma FC Köbenhavn frá Danmörku, lið Rúnars Alex Rúnarssonar, með 3,8 prósent og Gent frá Belgíu, lið Andra Lucasar Guðjohnsens, með 3,4 prósent.
Þá eru reiknaðar út líkurnar á að liðin komist áfram úr deildarkeppninni yfir í útsláttarkeppnina en þangað komast 24 lið af 36. Þar er Chelsea einnig í efsta sæti með 100 prósent líkur, á undan Real Betis og Fiorentina sem eru með 99,9 prósent líkur.
Víkingar eru í 33. sæti á þeim lista en líkurnar á því að þeim takist að komast í hóp 24 efstu liðanna eru taldar vera 13,6 prósent. Fyrir neðan þá eru The New Saints frá Wales (6,9%), Petrocub frá Moldóvu (5,5%) og Larne frá Norður-Írlandi (2,5%).
Cercle Brugge frá Belgíu er talið sterkast af þeim sex liðum sem Víkingar mæta og er sett í 9. sætið með 95,4 prósent líkur. LASK Linz frá Austurríki er í 12. sæti með 92,7 prósent, Djurgården frá Svíþjóð er í 14. sæti með 87,6 prósent, Omonia Nikósía frá Kýpur er í 15. sæti með 87,7 prósent, Noah frá Armeníu er í 27. sæti með 43,6 prósent og Borac Banja Luka frá Bosníu er í 32. sæti, næst fyrir ofan Víking, með 16,8 prósent líkur á að komast áfram.