Samuel Harvey lék sína fyrstu A-landsleiki fyrir karlalandslið Turks- og Caicoseyja í Þjóðadeild Norður- og Mið-Ameríku í nýafstöðnum landsleikjaglugga. Harvey er aðeins 14 ára gamall.
Hann er fæddur 15. október árið 2009 og verður því 15 ára gamall í næsta mánuði.
Það kom þó ekki í veg fyrir að Harvey hafi fengið tækifærið í marki Turks- og Caicoseyja í tveimur leikjum í Þjóðadeildinni.
Stóð hann í markinu í 4:0-tapi fyrir Belís og 2:0-tapi fyrir Angvilla.
Harvey er þó ekki yngsti leikmaðurinn sem hefur spilað A-landsleik í karlaknattspyrnu. Lucas Knecht var aðeins 14 ára og tveggja daga gamall þegar hann spilaði landsleik fyrir Norður-Maríanaeyjar árið 2007.