Senegalinn Aliou Cisse hefur látið af störfum sem landsliðsþjálfari karlaliðs þjóðar sinnar eftir níu og hálft ár í starfi, en samningur hans verður ekki endurnýjaður.
Undir stjórn Cisse varð Senegal Afríkumeistari árið 2022. Knattspyrnusamband Senegals vildi framlengja við Cisse en íþróttamálaráðuneyti Afríkuþjóðarinnar var á öðru máli.
Ráðuneytið hefur sín völd, því stjórn landsins greiðir laun landsliðsþjálfara, en ekki knattspyrnusambandið.
BBC greinir frá að ákvörðunin komi mörgum á óvart og sérstaklega tímasetningin, en Cisse hafði þegar tilkynnt um blaðamannafund á föstudag til að kynna nýjan landsliðshóp.