Eiður horfði á soninn á gamla heimavellinum

Eiður Smári Guðjohnsen var á meðal áhorfenda er enska liðið Chelsea mætti Gent frá Belgíu á heimavelli sínum í Sambandsdeild Evrópu í fótbolta í kvöld.

Andri Lucas Guðjohnsen, miðjusonur Eiðs, var í byrjunarliði Gent og lék fyrstu 64. mínúturnar. Lagði hann upp fyrra mark liðsins í 4:2-tapi.

Eiður var leikmaður Chelsea þegar Andri kom í heiminn. Með Eiði var elsti sonur hans Sveinn Aron Guðjohnsen.

Sverrir Ingi Ingason lék allan leikinn fyrir Panathinaikos í jafntefli við Borac Banja Luka frá Bosníu á útivelli, 1:1. Hörður Björgvin Magnússon var ekki með, en hann hefur ekkert spilað undanfarið ár vegna meiðsla.

Albert Guðmundsson kom inn á sem varamaður hjá Fiorentina er liðið lagði TNS frá Wales, 2:0. Guðmundur Þórarinsson lék allan leikinn með Noah, sem sigraði Mlada Boleslav 2:0.

Rúnar Alex Rúnarsson var allan tímann á bekknum hjá FC Kaupmannahöfn er liðið tapaði á heimavelli fyrir Jagiellonia frá Póllandi, 2:1.

• Blogga um frétt