Knattspyrnumaðurinn Milutin Osmajic, leikmaður Preston North End í ensku B-deildinni, hefur verið úrskurðaður í átta leikja bann fyrir að hafa bitið Owen Beck, leikmann Blackburn Rovers, í leik liðanna í deildinni í síðasta mánuði.
Osmajic, sem er 25 ára landsliðsmaður Svartfjallalands, viðurkenndi að hafa bitið Beck. Auk leikbannsins hefur hann verið sektaður um 15.000 pund, 2,7 milljónir íslenskra króna.
Undir lok leiksins í Preston fékk Beck rautt spjald fyrir að sparka í Duane Holmes, leikmann Preston. Osmajic brást við því með því að bíta Beck en slapp þrátt fyrir það við refsingu í leiknum sjálfum.
Svartfellingurinn getur næst spilað fyrir Preston laugardaginn 23. nóvember þegar liðið mætir Derby County.
Stefán Teitur Þórðarson leikur með Preston og Arnór Sigurðsson með Blackburn.