Mögnuð Cecilía verðlaunuð

Landsliðsmarkvörðurinn Cecilía Rán Rúnarsdóttir átti afar góðan leik fyrir Inter Mílanó er liðið gerði jafntefli við ríkjandi meistara Roma, 1:1, á útivelli í ítölsku A-deildinni í fótbolta á laugardag.

Cecilía varði níu skot í leiknum og átti stóran þátt í að Inter náði í gott stig gegn meisturunum. Enginn markvörður varði eins mikið og Cecilía í umferðinni. Mark Roma var sjálfsmark, sem Cecilía gat lítið gert í. 

Hún var verðlaunuð með sæti í liði fimmtu umferðarinnar, en liðið var birt á heimasíðu ítalska knattspyrnusambandsins.

Cecilía er að láni hjá Inter frá Bayern München en hún hefur mikið glímt við meiðsli undanfarin ár.

Inter er í þriðja sæti deildarinnar með ellefu stig, einu stigi á eftir Alexöndru Jóhannsdóttur og stöllum í Fiorentina og þremur á eftir toppliði Juventus. 

Cecilía er í liði 5. umferðarinnar. Ljósmynd/Knattspyrnusamband Ítalíu

• Blogga um frétt