Gríski knattspyrnumaðurinn George Baldock, sem fæddist og ólst upp á Englandi, er látinn aðeins 31 árs. Baldock fannst látinn í sundlaug á heimili sínu í Glyfada í Aþenu í dag.
Hann gekk til liðs við Panathinaikos í sumar eftir sjö ára dvöl hjá Sheffield United þar sem Baldock lék til að mynda þrjú tímabil í ensku úrvalsdeildinni.
Hjá Panathinaikos var hann samherji Sverris Inga Ingasonar og Harðar Björgvins Magnússonar og lék nokkrum sinnum með þeim fyrrnefnda en Hörður er að jafna sig á meiðslum.
Sumarið 2012 lék Baldock með ÍBV í úrvalsdeildinni hér á landi að láni frá Milton Keynes Dons og stóð sig einkar vel.
Alls lék hann tólf A-landsleiki fyrir gríska landsliðið.