Auðvitað var sárt að tapa þessum leikjum

„Auðvitað var sárt að tapa báðum þessum leikjum en þegar ég horfi um öxl stendur upp úr að það var frábært afrek að leika tvívegis til úrslita á HM.“

Þetta sagði hollenska knattspyrnugoðsögnin Johan Neeskens í samtali við Morgunblaðið fyrir fimm árum, spurður um úrslitaleikina tvo sem hann lék á HM, gegn Vestur-Þjóðverjum 1974 og Argentínumönnum fjórum árum síðar.  

„Við lékum án efa bestu knattspyrnuna, sérstaklega 1974, og unnum hug og hjarta heimsbyggðarinnar. Það er gömul saga og ný að í knattspyrnu vinna bestu liðin ekki alltaf.“

– Eruð þið jafnvel besta liðið sem aldrei varð heimsmeistari?

„Hugsanlega. Fólk naut þess alltént að horfa á okkur spila og núna, meira en fjörutíu árum síðar, muna margir eftir okkur. Það segir sína sögu. Það á kannski sérstaklega við um liðið 1974; tveir lykilmenn, Cruyff og Willem van Hanegem, voru báðir hættir með landsliðinu 1978.“

Neeskens og Frank Rijkaard á æfingu hjá Barcelona sumarið 2006, þegar þeir stýrðu liðinu. AFP/Lluis Gene

Ójafn slagur

Holland og Ísland mættust nokkrum sinnum á áttunda áratugnum og Neeskens kvaðst muna ágætlega eftir þeim viðureignum. „Best man ég eftir leiknum 1973. Hann fór 5:0,“ rifjaði hann upp og bætti svo sposkur við: „Fyrir okkur!“

„Þetta var auðvitað ójafn slagur. Getustig okkar í hámarki á þessum tíma en íslenska liðið nær alfarið skipað áhugamönnum. Við myndum aldrei sjá úrslit af þessu tagi í dag,“ sagði hann, eins og til að biðjast velvirðingar á glæpnum.

Johans Neeskens er minnst í lengra máli í Sunnudagsblaði Morgunblaðsins en hann féll frá á dögunum, 73 ára að aldri.