Sænski knattspyrnuþjálfarinn Jonas Eidevall hefur sagt starfi sínu sem knattspyrnustjóri kvennaliðs Arsenal lausu eftir slæma byrjun á tímabilinu.
Eidevall, sem er 41 árs, hafði stýrt liðinu undanfarin rúm þrjú ár. Undir hans stjórn vann Arsenal deildabikarinn undanfarin tvö tímabil.
Arsenal er í sjötta sæti ensku úrvalsdeildarinnar eftir fyrstu fjórar umferðirnar og hefur aðeins unnið einn leik í deildinni til þessa.
Þá fékk liðið stóran skell gegn Glódísi Perlu Viggósdóttur og stöllum hennar í Bayern München, 5:2, í Meistaradeild Evrópu í síðustu viku.
Aðstoðarþjálfari Eidevalls, Renee Slegers, tekur við starfinu af honum til bráðabirgða.