Rekinn af velli fyrir að hrækja á dómarann

Mexíkóinn Héctor Herrera, miðjumaður bandaríska knattspyrnuliðsins Houston Dynamo, var rekinn af velli fyrir að hrækja á dómarann í leik liðsins gegn Seattle Sounders í úrslitakeppni bandarísku MLS-deildarinnar. 

Herrera ákvað að hrækja á dómarann Armando Villarreal þegar hann var nýbúinn að fá gult spjald. Þá sneri Villarreal baki í Herrera sem hrækti að honum. 

Villarreal tók ekki eftir því en VAR-sjáin benti honum að kíkja í skjáinn og þar breytti dómarinn gulu í rautt. 

Houston tapaði leiknum í vítaspyrnukeppni og Seattle heldur áfram. 

Herrera er margreyndur landsliðsmaður sem á yfir 100 leiki að baki fyrir mexíkóska landsliðið. Þá lék hann með Porto í sex ár og Atlético Madríd í þrjú. 

• Blogga um frétt