Alfreð Finnbogason: „Takk fyrir allt“

Knattspyrnumaðurinn Alfreð Finnbogason hefur ákveðið að leggja skóna á hilluna, 35 ára að aldri.

Þetta tilkynnti hann í færslu sem hann birti á Instagram í dag en Alfreð var síðast á mála hjá Eupen í belgísku B-deildinni en rifti samningi sínum við félagið í september.

Frétt af mbl.is

Alfreð leggur landsliðsskóna á hilluna

„Kæri fótbolti, takk fyrir allt sem þú hefur gefið mér og fjölskyldu minni. Sem fimm ára strákur þá átti ég mér einn draum . Ég var það heppinn að ég fékk að upplifa hann á hverjum degi,“ skrifaði Alfreð í færslu sem hann birti á Instagram.

Skoraði fyrsta markið á HM

Alfreð á að baki farsælan feril en hann er uppalinn hjá Breiðabliki og var í lykilhlutverki hjá liðinu þegar það varð bikarmeistari í fyrsta sinn árið 2009 og Íslandsmeistari í fyrsta sinn árið 2010.

Hann hefur leikið með Lokeren og Eupen í Belgíu, Helsingborg í Svíþjóð, Heerenveen í Hollandi, Real Sociedad á Spáni, Olympiacos í Grikklandi, Augsburg í Þýskalandi og Lyngby í Danmörku á atvinnumannaferlinum.

Þá lék hann 73 A-landsleiki fyrir Ísland og skoraði í þeim 18 mörk en hann skoraði fyrsta mark Íslands á HM í Rússlandi árið 2018 gegn Argentínu.

• Blogga um frétt