Íþróttir | Fótbolti | mbl | 27.11.2024 | 22:03

Hákon og félagar unnu – jafnt á Englandi

Hákon Arnar fagnar vel í leikslok. AFP/Alberto Pizzoli

Skagamaðurinn ungi Hákon Arnar Haraldsson og liðsfélagar hans hjá franska liðinu Lille höfðu betur gegn Bologna frá Ítalíu á útivelli í deildarkeppni Meistaradeildarinnar í fótbolta í kvöld, 2:1.

Ngal'ayel Mukau gerði bæði mörk Lille á meðan Jhon Lucumí skoraði fyrir Bologna. Hákon er að koma til baka eftir meiðsli og hann kom inn á sem varamaður á 86. mínútu. Lille er í tólfta sæti með tíu stig.

Morgan Rogers skorar fyrir Aston Villa í kvöld en markið fékk ekki að standa. AFP/Darren Staples

Enska liðið Aston Villa og Juventus frá Ítalíu skildu jöfn í Birmingham, 0:0. Villa er í níunda sæti með tíu stig og Juventus í 19. sæti með átta stig.

Þá gerði Dortmund frá Þýskalandi góða ferð til Zagreb höfuðborgar Króatíu og sigraði Dinamo, 3:0. Jamie Gittens, Ramy Bensebaini og Serhou Guirassy skoruðu mörk Dortmund, sem er í fjórða sæti með tólf stig.