Alli æfir hjá Fabregas

Enski knattspyrnumaðurinn Dele Alli mun æfa með ítalska félaginu Como eftir jól í þeirri von að vinna sér inn samning hjá því.

Como leikur í A-deildinni á Ítalíu og er þar í 16. sæti af 20 liðum. Cesc Fabregas, knattspyrnustjóri Como, sagði við fréttamenn eftir leik liðsins gegn Roma í deildinni um helgina að Alli mætti æfa með liðinu á nýju ári.

Félagaskiptasérfræðingurinn Fabrizio Romano greindi svo frá því á X-aðgangi sínum að hann myndi hefja æfingar með ítalska liðinu þann 26. desember.

Cesc Fabregas þegar hann lék með Chelsea. AFP

Alli hefur ekki spilað í að verða tvö ár, það gerði hann síðast með Besiktas í febrúar á síðasta ári er hann lék að láni frá Everton. Alli hefur glímt við ýmis meiðsli og persónuleg vandamál utan vallar sem hafa haldið honum frá vellinum í þetta langan tíma.

Alli er 28 ára gamall miðjumaður og hefur æft með Everton undanfarna mánuði þrátt fyrir að samningur hans hafi runnið út í sumar.

• Blogga um frétt