Knattspyrnumaðurinn Hjörtur Hermannsson hefur gert samning við gríska félagið Volos. Hjörtur kemur til Volos frá Carrarese á Ítalíu.
Hjörtur var aðeins í hálft ár hjá Carrarese og spilaði síðast með liðinu í september. Hann samdi við félagið í sumar eftir veru hjá Pisa. Bæði Carrarese og Pisa leika í B-deild Ítalíu.
Volos er í tólfta sæti af fjórtán liðum í efstu deild Grikklands með 17 stig eftir 17 leiki.
Hjörtur, sem er 29 ára gamall miðvörður og uppalinn hjá Fylki, hefur einnig leikið með Bröndby í Danmörku og Gautaborg í Svíþjóð. Þá lék hann ungur að árum með varaliði PSV í Hollandi.
Í 29 A-landsleikjum hefur Hjörtur skorað eitt mark og á ferlinum hefur hann spilað 277 deildaleiki á Íslandi, í Hollandi, Svíþjóð, Danmörku og á Ítalíu.