Newcastle í kjörstöðu gegn Arsenal

Newcastle vann góðan 2:0 sigur á liði Arsenal í fyrri leik liðanna í undanúrslitum í enska deildabikarnum á Emirates-vellinum í kvöld.

Alexander Isak og Anthony Gordon skoruðu mörk Newcastle í leiknum. Seinni undanúrslitaleikurinn fer fram á heimavelli Newcastle, St. James Park þann 6. febrúar næstkomandi. Sigurliðið úr þessari viðureign mætir annaðhvort Tottenham eða Liverpool í úrslitum enska deildarbikarsins.

Leikurinn byrjaði mjög fjörlega og bæði lið fengu tækifæri til að skora í upphafi leiksins. Joelinton fékk gott færi strax á 4. mínútu leiksins eftir góða sendingu frá Alexander Isak en skotið hans fór hátt yfir. Á 13. mínútu leiksins fékk Arsenal hornspyrnu og Declan Rice sem tók hornspyrnuna hitti beint á kollinn á Jurrien Timber en skalli hans af stuttu færi fór yfir mark Newcastle.

Um miðjan fyrri hálfleikinn tóku heimamenn öll völd á vellinum og voru ansi nálægt því að komast yfir. Fyrst á 28. mínútu en þá átti Leandro Trossard flotta sendingu inn fyrir vörn Newcastle og þar kom Gabriel Martinelli á ferðinni og var einn á móti Martin Dúbravka, markmanni Newcastle, en skot hans fór í stöngina. Aðeins þremur mínútum síðar fékk Arsenal hornspyrnu en á einhvern ótrúlegan hátt náðu leikmenn Arsenal ekki að koma boltanum í netið eftir mikinn darraðardans í teignum.

Það voru hins vegar gestirnir sem náðu að koma boltanum í netið en á 37. mínútu leiksins fengu leikmenn Newcastle aukaspyrnu rétt við miðlínu vallarins. Dubravka tók spyrnuna og setti hann inn á teig Arsenal, þar var það Sven Botman sem skallaði boltann fyrir fætur Jacub Murphy og boltinn fór af honum til Alexander Isak sem var skyndilega kominn í einn í gegn og hann negldi boltanum í þverslána og inn af stuttu færi. Virkilega smekklega gert hjá Isak.

Í seinni hálfleik byrjuðu heimamenn ágætlega en aftur voru það gestirnir sem skoruðu. Á 51. mínútu átti Jacub Murphy góða sendingu á Alexander Isak inn á teig Arsenal. Það voru þrír leikmenn Arsenal í kringum hann en samt náði hann skoti á markið sem David Raya varði út í teiginn en þar var Anthony Gordon klár og setti boltann í tómt markið.

Stuttu eftir þetta mark gerðu báðir þjálfararnir þrefalda breytingu á sínum liðum og í kjölfarið tóku leikmenn Arsenal öll völd á vellinum. Kai Havertz fékk frábært færi til að minnka muninn á 58. mínútu en þá kom sending fyrir markið. Hann var aleinn á markteignum en hitti ekki boltann þegar hann ætlaði að skalla boltann í netið og boltinn fór í öxlina á honum og út af.

Á 64. mínútu átti William Saliba fínan skalla eftir hornspyrnu Declan Rice en boltinn fór fram hjá marki Newcastle. Áfram héldu heimamenn að sækja en þeir voru bara ekki að komast í gegnum þéttan varnarvegg gestanna og lokatölur í leiknum voru 2:0 fyrir Newcastle.

Newcastle er því komið með 2:0 forystu í einvígi liðanna en seinni leikur liðanna í undanúrslitum enska deildarbikarsins fer fram á St. James Park 6. febrúar næstkomandi. Tottenham og Liverpool mætast annað kvöld í fyrri leik liðanna í hinum undanúrslitaleiknum en sigurliðin úr þessum viðeignum mætast svo í úrslitum á Wembley Stadium 16. mars næstkomandi.

Lýsing uppfærist sjálfkrafa

Allar lýsingar í beinni

Arsenal	0:2	Newcastle	Opna lýsingu Loka
90. mín. Það verða að minnsta kosti fimm mínútur í uppbótartíma í seinni hálfleik á Emirates Stadium.
Augnablik — sæki gögn...

• Blogga um frétt