Júlíus á leið til Elfsborg

Knattspyrnumaðurinn Júlíus Magnússon, fyrirliði bikarmeistara Fredrikstad í Noregi, er á leið til Elfsborg í Svíþjóð.

Norski miðillinn Nettavisen skýrir frá því að viðræður séu á lokastigi og að kaupverðið sé um tíu milljónir norskra króna, 124 milljónir íslenskra króna, auk bónusgreiðslna.

Gangi allt eftir ferðast miðjumaðurinn sterki til Svíþjóðar á næstu dögum og fer því ekki með Fredrikstad í æfingaferð til Spánar á morgun.

Júlíus lék hverja einustu mínútu í 30 deildarleikjum í norsku úrvalsdeildinni á síðasta tímabili þegar liðið hafnaði í sjötta sæti og kom á óvart sem nýliði í deildinni.

Þá skoraði hann úr sigurvítaspyrnunni í vítakeppni í úrslitaleik bikarkeppninnar gegn Molde.

Hjá Elfsborg mun Júlíus hitta fyrir sóknartengiliðinn Eggert Aron Guðmundsson.

• Blogga um frétt